विद्यार्थी साहाय्यक समिती, पुणे – विद्यार्थी साहाय्यक समिती

ग्रामीण भागातील हजारो विद्यार्थ्यांच्या जीवनात परिवर्तन घडविणारी संस्था आहे. युवा परिवर्तनाचे केंद्र म्हणून विद्यार्थी साहाय्यक समितीच्या कामाकडे पाहिले जाते. समिती ही धर्मादाय आयुक्त कार्यालयाकडे सार्वजनिक विश्वस्त अधिनियम १९५० च्या कलम ५० ए (३) अंतर्गत नोंदणीकृत (क्र. ई-२१९, पुणे) संस्था असून संस्थेचे कार्यक्षेत्र संपूर्ण भारतभर आहे. समाजातील आर्थिकदृष्ट्या दुर्बल परंतु गुणवत्तेच्या जोरावर काहीतरी ध्येय ठेवून धडपड करणाऱ्या विद्यार्थी-विद्यार्थिनींना पुण्यात अतिशय माफक दरात राहण्याची आणि जेवणाची सोय उपलब्ध करून द्यावी या हेतूने ज्येष्ठ गणितज्ज्ञ डॉ. अच्युतराव आपटे, स्वातंत्र्यसेनानी हरिभाऊ फाटक, सुमित्राताई केरकर आदींनी १९५५ मध्ये या कामाला सुरवात केली. त्यावेळी पाच विद्यार्थ्यांची वेगवेगळ्या घरी वाराने जेवणाची सोय करण्यापासून काम सुरू झाले. पुढे विद्यार्थ्यांचा निवासाचा प्रश्न मार्गी लावला. मग विद्यार्थिनींसाठी सोय करण्यात आली. आता समितीचे पुण्यात ७ वसतिगृहे असून त्यातून सुमारे ११०० विद्यार्थी / विद्यार्थीनी येथील सुविधांचा लाभ घेत आहेत. समिती म्हणजे केवळ लॉजिंग बोर्डिंग नाही तर येथे माफक दरात निवास, भोजन व्यवस्थेबरोबर व्यक्तिमत्त्व विकास या संकल्पनेला सर्वाधिक महत्त्व दिले जाते. समितीत जात, धर्म, पंथ या संकल्पनेला थारा दिला जात नाही. स्वच्छता, समता आणि श्रमप्रतिष्ठा या त्रिसूत्रीवर समितीचे काम चालते. देणगीदार जरी शहरी भागातले असले तरी प्रवेश फक्त ग्रामीण भागातील गरजू आणि होतकरू विद्यार्थ्यांनाच दिला जातो.

समिती कार्यकारिणी

विश्वस्त मंडळ: (२०२३ - २०२६)

समितीचे कार्य विश्वस्त मंडळ, सल्लागार मंडळ, कार्यकर्ते याद्वारे व्यवस्थापित केले जाते. ज्यामध्ये समाजातील नामांकित सदस्य, विविध महाविद्यालये आणि शैक्षणिक संस्थांचे प्रमुख तसेच विविध क्षेत्रांतील तज्ज्ञ असतात.